Joventut Socialista de Catalunya

S’a constitusit dejà eth Grop de Joenessa d’Unitat d’Aran. Aguesta dimenjada a agut lòc era creacion e presentacion d’aguest collectiu format pes joeni e joenes que, ath laguens d’UA, vòlen trabalhar “a favor dera reflexion, eth debat, era formacion e er activisme sociau e politic en desvolopament de politiques de joenessa e de defensa der autogovèrn aranés, atau coma dera sua vinculacion damb eth progrès e era justícia sociau, com dues parts d’un madeish combat politic”, segontes afirme era sua Carta Fondacionau. Eth secretari generau d’UA, Francés Boya, a assistit ar acte de presentacion.

En representacion deth grop, Amador Marqués, membre dera Comission Executiva d’UA, a manifestat que “Joenessa d’UA ei un collectiu dubèrt as joeni comprometudi damb Aran e es sòns pòbles, que vòlen èster motor de cambi e renovacion dera politica e vòlen contribuir a promòir ua alternativa progressista en Aran, ua alternativa que combine era defensa fèrma der autogovèrn damb era consecucion d’un país mès just, mès equilibrat des deth punt d’enguarda sociau, economic e mieiambientau e damb mès oportunitats de trabalh e formacion”.

Era Joenessa d’UA a signat un protocòl de relacion damb era Joventut Socialista de Catalunya (JSC) entà “establir estratègies conjuntes en àmbit der intercambi d’experiéncies e aprenedisatge mutuau ena construccion d’un projècte progressista entà Aran e Catalonha e eth reconeishement dera identitat dera Val d’Aran e era promocion der occitan, aranés en Aran”. Eth protocòl a estat signat pera secretària de Coordinacion Territoriau dera JSC, Arantxa Calvera, e Amador Marqués. Pendent aguesta dimenjada, era JSC des Comarques de Lleida a celebrat en Vielha ua escòla d’iuèrn de formacion